Enxeñeiros informáticos promoven un uso "responsable e positivo" da tecnoloxía entre os máis novos

Con motivo do Día Internacional da Internet Segura, que se celebra este martes, o Colexio Profesional de Enxeñaría en Informática de Galicia (Cpeig) destacou que esta efeméride está destinada a promover un uso "seguro e positivo" das tecnoloxías, especialmente entre os mozos, e concienciar sobre a seguridade en internet.

"Este día non só pretende a creación dunha internet máis segura, senón mellor, a través do uso responsable, respectuoso, crítico e creativo que todos fagamos", sinalou o presidente do Colexio, Fernando Suárez.

En concreto, Suárez puxo en valor que se debe facer fincapé na importancia da ciberseguridade, privacidade e o uso das TIC na contorna dos menores, co obxectivo de protexer a súa reputación e a dos demais. "Os pais ou titores deben manter un diálogo aberto cos seus fillos, indicándolles a importancia da seguridade en liña e actuando como referentes de comportamento dixital", apuntou.

Entre os consellos que destacou o Colexio, aplicar o sentido común para evitar software malicioso, actualizar o sistema operativo, instalar un bo antivirus, realizar copias de seguridade, ter precaución coas redes wifi públicas e usar controis parentales.

Ordenadores Concello de Santiago