O presidente da Deputación de Ourense cualifica de "trámite ordinario" o suplicatorio para xulgar a Baltar

O presidente da Deputación de Ourense, Luís Menor, encadrou nun trámite "ordinario" o suplicatorio proposto pola maxistrada do Tribunal Supremo, Ana Ferrer, para solicitar ao Senado para que o seu predecesor no cargo, Manuel Baltar, sexa xulgado por un delito penal contra a seguridade viaria por conducuir a 215 km/h nunha autovía.

Este xoves, despois de coñecerse a exposición razoada á Sala Segunda na que propón solicitar un suplicatorio ao Senado ao apreciar contra el "indicios racionais de criminalidade", Luís Menor incidiu en que "non é habitual renunciar á inmunidade, o habitual é que se solicite, como nesta situación, por un trámite ordinario".

Menor, que lembrou que é membro da Administración de Xustiza, sostivo que se trata dun trámite ordinario, "un trámite de petición" e que "se se cumpren os requisitos" "o normal" é que o órgano, neste caso o Senado, "autorice o levantamento".

"É un trámite regulado, non depende da vontade, nin para ben nin para mal. É o trámite que corresponde a calquera persoa aforada, co suplicatorio, se cumpre os requisitos xurídicos que a lei establece con claridade, normalmente non hai ningunha discrepancia en orde á concesión ou denegación do mesmo", remarcou.

Menor subliñou que a inmunidade é unha figura que se crea para evitar acusacións de carácter político. "Se fose ese sentido, o normal sería que se denegase para que a persoa continuase desempeñando o seu papel", engadiu antes de apuntar que, se se trata de aspectos relacionados coa vida ordinaria, "o normal é que se conceda, libérese ese obstáculo e continúese o procedemento cos trámites ordinarios".

O ex presidente da Deputación de Ourense, Manuel Baltar, o presidente actual, Luis Menor, e o presidente da Xunta de Galicia, Alfonso Rueda, durante un mitin do Partido Popular | Fonte: Agostime - Europa Press