Formoso reivindica o papel das mulleres para eliminar a fenda de xénero no deporte
O presidente provincial lembrou tamén que "a eliminación de estereotipos e roles é un traballo arduo", pero animou a perseverar, tanto desde as institucións como no plano individual.
Por E.P. | SANTIAGO DE COMPOSTELA | 14/03/2024 | Actualizada ás 20:52
O presidente da Deputación da Coruña, Valentín González Formoso, reivindicou hoxe a participación das mulleres na toma de decisións dos diferentes estamentos deportivos como medio para eliminar a desigualdade nese ámbito.
Foi na inauguración do simposio 'Fenda de xénero no deporte', que a institución provincial celebrou na Fundación Luís Seoane coa colaboración da Fundación Real Club Deportivo.
Formoso afirmou que, "pese a que a aparición de referentes no deporte feminino e o incremento do número de mulleres na práctica deportiva é constante, non o é a súa participación na toma de decisións", algo que, ao seu xuízo, implica que "mentres non contemos coa súa perspectiva, será imposible conseguir a igualdade".
O presidente provincial lembrou tamén que "a eliminación de estereotipos e roles é un traballo arduo", pero animou a perseverar, tanto desde as institucións como no plano individual.
