Volven as marchas da dignidade
As 60 organizacións da esquerda galega que colaboran nas marchas da dignidade xa comezaron o traballo para unha nova edición. Desta volta, a marcha final será o 24 de outubro na Praza do Obradoiro. Antes, e a modo de preparación, haberá mobilizacións nas sete cidades do país.
Por Galicia Confidencial | Santiago de Compostela | 26/09/2015 | Actualizada ás 22:01
Así, o xoves 8 de outubro haberá manifestacións nas 7 principais urbes. Será as 20 horas da tarde, salvo en Ferrol, que será as 18:30 horas.
Nalgúns concellos como O Barco e A Coruña xa se presentaron por rexistro mocións para que os municipios apoien a iniciativa oficialmente. Mocións semellantes entregaranse en varios concellos de todo o país.
Nas mocións denúnciase que "a chamada crise económica lonxe de rematar chegou para quedarse, por moito que algúns utilicen certos indicadores económicos para aparentar unha mellora que nada ten que ver coa realidade nin cos sectores populares".
As marchas da digniddade levan máis de dous anos mobilizándose na rúa "para esixir o remate das políticas que agreden á maioría social golpeada pola chamada crise". Esta cooperación entre tantos axentes a pé de rúa foi un dos xermes que cristalizou nas mareas que, en termos xerais, lograron uns bos resultados en Galicia o pasado 24M.
As novas mobilizacións chegarán en plena precampaña das eleccións xerais. Tameń estarán marcadas polas negociacións cara a organización da esquerda galega para eses comicios de decembro, negocaicións que arestora tentan construír unha única Marea Galega.
A Marea Atlántica, que goberna na Coruña, xa anunciou o seu apoio as Marchas porque a Marea Atlántica "creouse para dar resposta, desde o concello, a unha demanda de cambio no xeito de facer política, desde a honestidade e a transparencia, na procura do ben común e na defensa das persoas máis necesitadas".
