Unanimidade no pleno para aprobar a creación do Consello Municipal de Igualdade de Santiago
Por E.P. | SANTIAGO DE COMPOSTELA | 24/04/2024 | Actualizada ás 11:19
Todos os grupos do pleno municipal de Santiago aprobaron este mércores o regulamento do Consello Municipal de Igualdade, un órgano ideado para a participación da cidadanía nas materias de igualdade efectiva entre mulleres e homes e do colectivo LGTBIQ+. Trátase do último paso, previa exposición pública, á súa posta en marcha.
A iniciativa foi defendida en pleno pola alcaldesa, Goretti Sanmartín, que lembrou a relevancia de que poida "haber unha participación cidadá en temas de relevancia", tales como a igualdade entre homes e mulleres e co colectivo LGTBIQ+.
"É algo que lle debemos ás asociacións e entidades que fan un traballo neste ámbito", dixo a rexedora, que considerou esta aprobación "unha moi boa noticia" para "dar pasos adiante" na materia e "demostrar que, máis aló de declaracións e pronunciamentos públicos", ponse en marcha "ferramentas e recursos".
Na súa intervención, a concelleira socialista Mercedes Rosón apuntou que esta "é unha desas cuestións que requiren unanimidade e consenso" e eloxiou a Compostela como "unha cidade aberta, libre e de vangarda" na que "non hai espazo para discursos" contrarios ao a igualdade.
Finalmente, o edil popular Borja Rubio aplaudiu a iniciativa, aínda que criticou que se inclúan no mesmo consello os temas relativos a igualdade e a colectivo LGTBIQ+, apuntando que esta última materia podería tratarse nun órgano propio. "Son dúas cousas que, aínda que teñen moito en común, tamén teñen problemáticas ou retos específicos", considerou. A alcaldesa respondeu que non se pecha a que, nun futuro, poida haber un consello propio.
