Persoal de Zara Loxística de Arteixo protesta contra o "paro patronal" o 1 de maio e o envío de traballo a outros centros

Persoal de Zara Loxística en Arteixo secunda nesta xornada paros laborais, dunha hora por cada quenda de traballo, para denunciar o "incumprimento" dos calendarios anuais e que se están quedando "sen carga de traballo" polo envío do mesmo a outros centros, segundo denunciaron.

"Invéntanse un peche patronal coa escusa de que non hai carga de traballo cando si existe, é o único centro que vai facer 'folga' o 1 de maio", aseverou Álvaro Cajigal, representante de UGT, na rolda de prensa ofrecida por representantes sindicais tamén de CGT, CIG e CCOO, que aludiron, ademais, a falta de investimentos.

Todos aseguraron que os paros, dos que destacaron o "éxito" do seguimento, continuarán. "Isto é o comezo de algo e hai que paralo", incidiron para manifestar que é a "primeira vez" que se incumpre o acordo de condicións laborais, ao traballar sempre o 1 de maio, e que agora este ano terán que "recuperar".

Roberto Pérez Vila, delegado da CIG, aseverou tamén, como os demais, que hai "unha paulatina desviación de carga de traballo para outras plataformas loxísticas de Inditex e para subcontratas que traballan con salarios inferiores". "Pechan por completo o almacén e obrígannos a modificar o noso calendario de traballo", sentenciaron sobre o que lles ocorrerá o 1 de maio, día no que, de non traballar nalgunha ocasión, aseguraron que sempre foi con comunicación e acordo previo.

Arturo Julián, de CCOO, manifestou, á súa vez, que a empresa "está estratexicamente desmantelando a nivel de fabricación e loxística o centro neurálxico do polígono de Sabón". "Non se está respectando o sistema de libranzas pactados ou o sistema de vacacións que temos", resumiu José Luís García, delegado da CGT. "É un atropelo que nos fai Inditex con modificación e empeoramento dos calendarios, está a incumprirse o acordo 2023-2025", engadiu.

Protestas ante a sede de Inditex | Fonte: M. Dylan - Arquivo