Encontran o corpo sen vida dunha muller xunto a un regato en Carral
O cadáver non presenta signos de violencia
Por Europa Press / Redacción | SANTIAGO DE COMPOSTELA | 08/05/2024 | Actualizada ás 19:07
O corpo sen vida dunha muller foi localizado na tarde deste mércores xunto a un regato no concello coruñés de Carral.
Minutos despois das 17,00 horas deste mércores, unha veciña deu a voz de alarma tras atoparse co cadáver nas inmediacións dun pequeno río situado en lugar de Taramuño, na parroquia de Vigo.
Ata o lugar mobilizáronse Urxencias Sanitarias e o forense, que certificaron o falecemento da muller, de idade avanzada e que residía nas proximidades de lugar onde foi atopada, segundo trasladaron fontes próximas ao caso.
O cadáver, que non presenta signos de violencia, será trasladado ao Complexo Hospitalario Universitario da Coruña para realizarlle a autopsia.
