Ollo a partires deste luns: a DGT inicia en Galicia unha campaña especial de vixilancia nas estradas en obras
O obxectivo, segundo explicou a delegación do Goberno en Galicia, é garantir o cumprimento da sinalización preventiva que se instala cando se realizan traballos na calzada, xa que a DGT advirte que se incumpre reiteradamente.
Por Europa Press / Redacción | SANTIAGO DE COMPOSTELA | 02/06/2024 | Actualizada ás 12:43
A Dirección Xeral de Tráfico (DGT) e a Agrupación de Tráfico da Garda Civil iniciarán este luns en Galicia unha campaña especial para controlar os tramos en obras de vías interurbanas. O obxectivo, segundo explicou a delegación do Goberno en Galicia, é garantir o cumprimento da sinalización preventiva que se instala cando se realizan traballos na calzada, xa que a DGT advirte que se incumpre reiteradamente.
Pola súa banda, desde Tráfico subliñan que seguir estas indicacións é fundamental para garantir a seguridade de todos os usuarios da vía. Desde este luns e ata o domingo día 9, os axentes vixiarán o respecto á sinalización extraordinaria nas vías por realización de obras, a atención e a precaución durante eses tramos, a redución da velocidade por obrigación e por prudencia e o incremento da distancia de seguridade.
