Sandra Penelas, Premio de Xornalismo Científico Celia Brañas
Foi por unha reportaxe sobre impresión 3D de formigón. Elisabet Fernández consegue un accésit por un traballo sobre investigación agroalimentaria.
Por Europa Press / Redacción | SANTIAGO DE COMPOSTELA | 03/06/2024 | Actualizada ás 11:09
A xornalista Sandra Penelas alzouse co IX Premio de Xornalismo Científico Celia Brañas, que convoca a Real Academia Galega de Ciencias (RAGC) coa colaboración da Axencia Galega de Innovación, por unha reportaxe sobre os beneficios da impresión 3D de formigón, publicado o 8 de outubro de 2023 no diario Faro de Vigo.
O traballo de Penelas, titulado 'A UVigo ensaia como reducir a corrosión mediante a impresión 3D de formigón', profunda nun proxecto nacional liderado por enxeñeiras da Universidade de Vigo, que avalía os beneficios da impresión 3D neste material, destacando que estes cementos condutores protexerán as estruturas porque pesa menos e reducirán custos e impacto ambiental.
O xurado do premio destacou que a reportaxe pon en valor o traballo dos grupos de investigación que desenvolven o proxecto e, ademais, contribúe a visibilizar o papel da muller na ciencia. Penelas destacou que, no ámbito do seu traballo sobre educación, ciencia, e divulgación, puido coñecer expertos e centros de investigación galegos "que traballan ao máis alto nivel, aínda que moitas veces sen o recoñecemento que merecen por parte da sociedade e das institucións".
ACCÉSIT
Por outra banda, os convocantes do premio tamén outorgaron un accésit á segunda peza mellor valorada, unha reportaxe de Elisabet Fernández titulado 'A elite alimentaria capta 2,5 millóns nun ano desde Ourense', publicado o 29 de novembro de 2023 en La Región.
No seu texto, a xornalista dá a coñecer o traballo dos grupos de investigación do Instituto de Agroecoloxía e Alimentación do campus de Ourense (UVigo), que desenvolven proxectos moi vinculados ao territorio.
