Remata a construción do primeiro monopile en Navantia Fene con destino a un parque eólico mariño en Escocia

A planta que Navantia Seanergies, división de enerxías verdes da empresa naval pública emprazada en Fene, concluíu en UTE con Windar Renovables a fabricación do primeiro monopile para un parque eólico mariño en augas de Escocia, o East Anglia Three, que está a ser desenvolvido pola empresa Scottish Power, filial de Iberdrola.

Esta é a primeira das estruturas fixas dun total de 45 monopiles, asinado en abril de 2023, e que segundo as previsións vai supor 900.000 horas de traballo durante un prazo de 15 meses, o que xa está a xerar ao redor de 450 empregos entre Navantia, Windar e a industria auxiliar nas instalacións da antiga Astano.

O primeiro monopile xa executado ten unhas dimensións de 84 metros de lonxitude, ten un peso de 1.800 toneladas e 10,6 metros de diámetro. A unidade xa se atopa na zona de almacenamento do estaleiro, tras pasar polo taller de fabricación de monopiles e polo taller de pintura.

Estas cimentacións corresponden ao parque eólico East Anglia 3, que se atopa dentro do complexo eólico mariño de East Anglia (2.900MW), en augas británicas e do cal 42 jackets do proxecto East Anglia ONE e unha subestación tamén foron construídos nas instalacións da comarca de Ferrol.

Monopile nunha das chairas do estaleiro de Fene | Fonte: NAVANTIA