As obras da ponte Esperela, en Leiro, obrigan a cortar o tráfico na OU-209 a partir deste luns

As obras de renovación do pavimento e a instalación dunha nova iluminación na ponte Esperela, en Leiro, obrigarán a cortar o tráfico na estrada OU-209 a partir deste luns. Tal e como informou a Xunta, a execución desta intervención require a ocupación total do ancho do tramo obxecto das obras. Neste sentido, é necesario o corte da circulación pola OU-209 no tramo entre os puntos quilométricos 3+820 e 3+990.

Este corte terá lugar durante a execución dos traballos, ao longo dos próximos 3 meses aproximadamente. Para facilitar a mobilidade nesta zona, habilitarase un itinerario alternativo para os vehículos que necesiten cruzar o río Avia. Así, en lugar de utilizar a Ponte Esperela situado á altura do punto 3+900 da OU-209, os condutores deberán utilizar a ponte á altura do punto 0+140.

Os vehículos que circulen pola estrada OU-504 deberán virar á esquerda se circulan cara a Cea ou á dereita se van cara a Ribadavia, na intersección coa estrada OU-209 situada á altura do punto 6+700, tomando a OU-209 para cruzar o río Avia. Os coches que circulen pola estrada OU-209 cara á ponte Esperela para cruzar o río Avia deberán efectuar un cambio de sentido para dirixirse cara á intersección coa estrada OU-504, cruzando a ponte situada á altura do punto 0+140 da mesma estrada OU-209.

Roza de estradas autonómicas | Fonte: XUNTA - Arquivo