A Xunta presume de informe PISA: "Somos líderes en equidade, ciencia e pensamento creativo"
Pon en valor a súa utilidade para medir o éxito das políticas públicas e planificar os esforzos cara á excelencia académica.
Por Europa Press / Redacción | SANTIAGO DE COMPOSTELA | 11/07/2024 | Actualizada ás 13:10
O conselleiro de Educación, Ciencia, Universidades e FP, Román Rodríguez, destacou este xoves a avaliación que realizan estudos como o informe PISA como a mellor ferramenta para a mellora do sistema educativo.
Fíxoo na inauguración do foro de alto nivel 'A avaliación educativa de hoxe: perspectivas a medio e longo prazo', desenvolvido en colaboración coa Organización de Estados Iberoamericanos (OEI) e que reúne en Santiago de Compostela a case 200 directores de centros de educación, inspectores e docentes.
O obxectivo do encontro é facer unha análise exhaustivo deste informe, da súa metodoloxía e procedementos, e de como esta ferramenta de avaliación pode empregarse para mellorar o sistema. Tal e como explicou o titular do departamento educativo da Xunta, a avaliación é parte dun proceso permanente e personalizado que permite "medir o éxito da estratexia na educación e fixar os reforzos que encamiñen a alcanzar o obxectivo de excelencia".
"Os datos das avaliacións son o combustible que facilita a transformación do sistema", afirmou o conselleiro, que sinalou o informe PISA como unha das principais ferramentas para introducir melloras no sistema e destacou o éxito de Galicia neste estudo grazas ao traballo dos docentes e á estabilidade nas políticas públicas en Galicia.
"No último informe, referido ao ano 2022, situáronse como líderes en equidade, ciencia e pensamento creativo e por encima da media do OCDE en todas as variables", detallou. O conselleiro indicou que, segundo PISA, "en Galicia calquera estudante logra un bo rendemento sexa cal for a súa situación social, económica ou cultural".
