"As nenas e mulleres xitanas, cada vez máis empoderadas, están a romper estereotipos"

O Concello de Ferrol conmemorou os 600 anos do pobo xitano cun emotivo acto de "unidade, memoria e futuro", celebrado na mañá deste martes nas instalacións municipais situadas na praza de Armas. No evento, o alcalde, José Manuel Rey Varela (PP), destacou que esta é "unha data que non só lembra o pasado, senón que proxecta con forza o futuro dunha comunidade marcada pola resistencia, a cultura e a loita pola igualdade".

A conmemoración, celebrada coa participación de representantes de todos os grupos municipais, diversas entidades sociais e veciños foi unha mostra de unidade institucional e social ao redor dunha causa que xa forma parte da alma ferrolá. "Ferrol sempre estará ao voso lado, para construír xuntos unha sociedade máis xusta e aberta", expresou o alcalde.

Tamén se viviron momentos significativos como a lectura dunha declaración por parte de mozos xitanos, a entrega simbólica da bandeira romaní, e a evocación do himno "Gelem, Gelem", que lembra ás vítimas xitanas do nazismo. A edil de Benestar Social de Ferrol, Rosa Martínez Beceiro, detallou que un dos eixos do acto foi a reivindicación do papel fundamental das mulleres xitanas, verdadeiras protagonistas do cambio. Púxose en valor o seu papel como transmisoras da cultura, como motor de transformación e como referente para as novas xeracións.

"As nenas e mulleres xitanas, cada vez máis empoderadas, están a romper estereotipos e alcanzando metas que antes parecían impensables", indicou. Tamén houbo espazo para recoñecer o papel da educación, o acceso ao emprego, e a necesidade de continuar combatendo a discriminación desde todos os ámbitos. Desde a administración local tomouse nota de propostas concretas como o establecemento de referentes xitanos con recoñecemento permanente na cidade.

Ferrol conmemora os 600 anos do pobo xitano cun emotivo acto de 'unidade, memoria e futuro' | Fonte: CONCELLO DE FERROL