A Xunta actualizará a normativa para mellorar a regulación da pesca marítima e a ordenación da frota

A Xunta actualizará a normativa para unha mellor e máis adecuada regulación do exercicio da pesca marítima profesional e da ordenación da frota, tal e como anunciou este luns o presidente do Goberno galego, Alfonso Rueda.

Esta decisión xorde da necesidade de obter unha nova disposición de carácter integrador que conduza un mellor desenvolvemento da Lei de pesca autonómica e persegue unha mellor conservación, xestión e explotación responsable e sustentable dos recursos mariños; a determinación das artes para o exercicio da actividade; e as cuestións básicas para a reorganización dos plans que a regulen.

Precisamente, o Consello da Xunta deu este luns conta do informe da Consellería do Mar sobre esta revisión e actualización normativa para a elaboración dunha disposición de carácter xeral con rango de decreto que implique a regulación do exercicio da pesca marítima profesional e a ordenación da frota en augas de competencia da Comunidade autónoma.

O informe realiza un estudo previo para xustificar a necesidade dunha ampla revisión que simplifique, racionalice e actualice a normativa en materia de pesca co fin de establecer as bases para a elaboración dunha nova disposición de carácter xeral con natureza integradora e sistematizadora, á vez que cumpra cos principios e criterios da boa regulación que, segundo indicou a Xunta, reinan na actualidade na lexislación autonómica.

E é que, conforme indicou o Goberno galego, as normas actuais requiren dunha actualización como consecuencia do novo marco legal comunitario e nacional en materia de pesca, debéndose abordar unha profunda reforma para obter unha visión integradora que conduza a un mellor desenvolvemento da Lei de Pesca de Galicia.

MOSTRAXES OCEANOGRÁFICAS DE INTECMAR

Por outra banda, a Xunta puxo en valor a rede de mostraxes oceanográficas de Intecmar, que realiza 80.000 análises anuais para garantir a calidade dos produtos do mar de Galicia.

Este instituto emite 7.000 informes e resolucións por ano sobre a seguridade alimentaria e a seguridade animal, o que permite a comercialización dos moluscos coas garantías hixiénico-sanitarias recomendadas. Ademais, os datos dan conta da dinámica das rías, contribuíndo a detectar proliferacións de microalgas tóxicas.

Co obxectivo de dar continuidade a este traballo, que dá cobertura a 43 estacións, situadas nas Rías Baixas e no golfo Ártrabo, está formalizada unha orde de execución para os próximos 24 meses por valor de 489.000 euros. Esta rede, que existe desde 1992, conta con máis de 50.000 perfís, superando amplamente os 30 anos e é unha das series oceanográficas máis longas do mundo.

O presidente da Xunta, Alfonso Rueda, preside a reunión do Consello do Executivo galego / Xunta de Galicia / Europa Press