HUMOR: Atopan un autónomo “que non hai que andar detrás del"

"Levo un mes esperando para que me dea un orzamento", "quedou en pasar hai dous meses e aínda estou esperando", "empezou os traballos, parou uns días para acabar outro que tiña a medias e non lle volvín ver o pelo", “anos despois de facerlle un encargo atopeino o outro día pola rúa e dime ‘xa arreglarías, ou?”, “encargueille o dormitorio do pequeno para a comuñón e chámame agora, que ten 2 fillos e vive en Suiza”?... Estas e outras frases polo estilo son bastante comúns cando se vive a experiencia de contratar a un autónomo, experiencia que se converte en moitos casos nunha verdadeira odisea.

Pois ben, malia estes tópicos de impuntualidade e despreocupación cos que son sinalados estes profesionais por conta propia, este medio atopou recentemente un caso excepcional, quizais único, que desminte todo o anterior.

No Concello de Leiravella dáse un caso inédito de puntualidade e cumprimento. Non imos desvelar aquí o nome do profesional, para evitar que colapse de traballo, pero si podemos falar dalgunhas das súas bondades: colle o teléfono á primeira chamada, queda en realizar a visita a unha hora e alí se presenta puntual coma un reloxo, cando non pode dar solución ao momento queda en pasar ao día seguinte e así o fai, á hora acordada xa está chamando na porta, non sabe o que é procrastinar, non deixa os traballos a medio facer, cumpre sempre coa súa palabra, ten un sentido da responsabilidade extremo, anota e lembra todos os encargos, cobra cando ten que cobrar, é facilmente localizable... e o máis incrible de todo, “non hai que andar detrás del para que faga as cousas”.

O autónomo en cuestión, una ‘rara avis’ na súa raza, está sendo agora estudiado por un equipo de investigadores das Facultades de Psicoloxía e Socioloxía da USC co fin de atopar que trazos do seu comportamento fan que sexa diferente ao resto de autónomos. Quedou desbotado xa que fóra vasco, alemán ou suízo...