Sentenza por inxurias á alcaldesa de Boborás: condena con tratamento psiquiátrico para o acusado
Eeste home publicou frases denigrantes e falsas sobre a rexedora municipal do concello ourensán, entre outras cousas, que "vendía droga".
Por E.P. | Santiago de Compostela | 02/08/2024 | Actualizada ás 20:25
O Penal 2 de Ourense impuxo a un home acusado de inxuriar á alcaldesa de Boborás unha medida de seguridade de liberdade vixiada, consistente na obrigación de recibir tratamento médico adecuado á súa patoloxía mental durante un máximo de dous anos, quedando así absolto.
Entre outubro de 2020 e maio de 2021 este home publicou frases denigrantes e falsas sobre a rexedora municipal do concello ourensán a través dun perfil na rede social Facebook, onde tamén compartiu imaxes e varios vídeos inventando a vida persoal da alcaldesa e indicando, entre outras cousas, que "vendía droga".
"Que un exerza un cargo público non implica que teña que soportar de maneira constante e reiterada comentarios vexatorios, facendo alusión á súa vida sexual, ou nos que se deixa caer que poida estar inmersa en actividades delituosas", dita a sentenza na que a maxistrada sinala que "non se concibe" que eses comentarios poidan enmarcarse nun espírito de crítica política porque son "claramente atentatorias da dignidade dunha persoa".
Neste sentido, sinala que "poucas dúbidas alberga" acerca da comisión polo acusado dos ilícitos penais contra a honra que se lle imputaban. A pesar diso, a xuíza decidiu absolvelo por mor dun eximente completo de anomalía psíquica. O acusado padece un trastorno de ideas delirantes, unha patoloxía psiquiátrica de curso crónico que lle leva a unha interpretación anómala da realidade, que no momento dos feitos, cando aínda non estaba diagnosticado, anulaba as súas capacidades.
Así pois, imponlle ao acusado unha medida de seguridade de liberdade vixiada consistente na obrigación de seguir a tratamento médico externo, adecuado á súa patoloxía, durante un período de tempo máximo de dous anos. En concepto de responsabilidade civil a obrigación de abonar á alcaldesa 2.000 euros en concepto de danos morais.
"É unha sentenza e hai que acatala", di a rexedora quen cuestiona se o acusado non sabería realmente o que faría porque, a pesar do seu trastorno, "ao longo do tempo sempre se dirixiu ás mesmas persoas, a min, a outra concelleira e ao alcalde do Carballiño". É por iso que Torres ve "certo grao de maldade nas súas accións" porque "nunca o facía con outros".
Ademais, apunta que o día do xuízo o denunciado non se presentou. "Que fácil é insultar á alcaldesa, a concelleiras e outras persoas a través do anonimato dun computador", reprocha Torres, quen celebra que "polo menos queda claro que é delito e de face a novos casos hai precedente e non todo vale".
