O BNG acusa ao PP de darlle prioridade á "conta de resultados de empresas amigas e familia"

A deputada do BNG Montse Prado esixiu este martes ao PP que "priorice" a saúde dos galegos e das galegas e non "a conta de resultados das empresas amigas e da familia". Para iso, elixiu Vilagarcía de Arousa, capital da comarca do Salnés, como "lamentable exemplo" das "deficiencias" no transporte sanitario urxente para demandar máis medios, tanto humanos como de ambulancias medicalizadas e helicópteros.

"Só cos 470 millóns de euros de sobreprezo do Álvaro Cunqueiro poderíase pagar o persoal de 40 ambulancias medicalizadas durante dez anos", advertiu Prado, quen cualificou a política do PP na sanidade de "elección ideolóxica", polo que lle instou a "rectificar" e facer un estudo das necesidades reais que existen no servizo de emerxencias sanitarias en Galicia.

Na súa comparecencia, na que estivo acompañada por persoal do 061 e por cargos orgánicos e institucionais do BNG, reclamou á Xunta do PP que destine os fondos a recursos para que a sanidade galega dispoña dunha asistencia "digna".

"Que unha persoa morra por falta de atención é evitable e a Xunta ten que dispor dos medios para que o sexa e para que os tempos de resposta non supoñan que a poboación estea a correr serios riscos de quedar desatendida", esgrimiu.

A deputada encargada da área sanitaria no Bloque recalcou que, "por moito que insista o PP, as galegas e os galegos nin están tranquilos, nin teñen garantida a atención sanitaria" xa que Galicia "só conta con 12 ambulancias asistenciais de soporte vital avanzado medicalizadas", localizadas en Ferrol, Santiago de Compostela, Lugo, Ourense, Pontevedra, Vigo e dúas na cidade da Coruña. Tamén teñen SVA no Salnés, Foz e Monforte, aínda que "este tres contan cun só técnico".

HELICÓPTEROS

En canto a helicópteros de soporte vital avanzado, Prado denuncia que só hai dous, un en Ourense e outro en Santiago. A esta "falta de dispositivos", agregou que hai que engadir as "lamentables" decisións do PP na Xunta como "permitir á empresa Eliance, concesionaria do servizo de helicópteros para emerxencias sanitarias, que incumpra o contrato de prestar o servizo de orto a ocaso, tanto na base de Santiago como na de Ourense".

"Meses nos que no canto de estar operativos 16 horas, permítenlle estar ata catro menos", asegurou, para subliñar, a continuación, que se trata de "catro horas menos de atención e moito aforro para a empresas".

Tanto os helicópteros, como as ambulancias de SVA, advertiu a nacionalista, "son fundamentais diante dunha emerxencia, dada a dispersión xeográfica en Galicia e as enormes distancias a percorrer en moitas zonas para chegar a un hospital", advertiu.

AMBULANCIA MEDICALIZADA

Por outra banda, Prado tamén criticou a decisión da Xunta de "trasladar a ambulancia medicalizada da súa base no hospital do Salnés a Sanxenxo", no canto de reforzar a situación deste concello cunha ambulancia distinta.

"Non ten ningunha xustificación trasladala pra Sanxenxo durante o verán e moito menos prolongalo ata outubro, nin que lle permitan a Eliance non ter operativos os dous helicópteros de orto a ocaso os 365 días do ano", remarcou.

Tamén lembrou que, no que vai de verán, houbo que lamentar a falta da ambulancia medicalizada no hospital do Salnés en tres ocasiones, que fose difundido polos medios, "o 7 de xullo nun atropelo mortal, o 21 cunha parada cardíaca, e o pasado 6 de agosto por unha colisión dun patinete cun vehículo".

"No tres ocasiones puxéronse en evidencia as consecuencias de que a ambulancia medicalizada non estea no hospital do Salnés. Non sabemos se a ambulancia ou o helicóptero chegasen no tempo establecido o desenlace fose outro, pero o que si sabemos é que non tiveron a oportunidade", lamentou.

Finalmente, avanzou que o Bloque levará este asunto ao Parlamento para que se emende a situación "canto antes".

A deputada do BNG Montse Prado participa nun acto reivindicativo en Vilagarcía en defensa dunha mellor dotación de medios de emerxencias.. BNG | Fonte: Europa Press