O PSdeG urxe á Xunta o plan estratéxico de Servizos Sociais "despois de 16 anos incumprindo"
Longueira lembra que este plan "é fundamental para o desenvolvemento da Lei.
Por Europa Press / Redacción | Santiago de Compostela | 21/08/2024 | Actualizada ás 13:08
A portavoz de Política Social do Grupo Socialista no Parlamento galego, Silvia Longueira, presentou unha serie de iniciativas parlamentarias para reclamarlle á Xunta "que cumpra coa Lei e presente antes de que termine o ano o Plan Estratéxico de Servizos Sociais".
Nun comunicado, Longueira lembra que este plan "é fundamental para o desenvolvemento da Lei no que ten que ver coa regulación dos servizos sociais comunitarios de titularidade municipal".
A responsable socialista explica que a presentación deste Plan, que tería unha vixencia de seis anos, "é un deber fixado pola Lei de Servizos Sociais de 2008, que deposita na Xunta o liderado do Sistema de Servizos Sociais".
"Con todo, o Goberno galego suma xa 16 anos de atraso para asumir as súas competencias neste sentido, cunha política de brazos caídos que explica de forma cristalina o seu nulo interese no desenvolvemento dos Servizos Sociais", sostén.
Tamén denuncia "falta de implicación da Xunta, ao negarse de facto a cumprir co seu deber de elaborar o plan que, segundo a Lei de Servizos Sociais, tiña que formular en función das necesidades sociais da cidadanía galega".
