Mar apoia as demandas do sector e reclama ao Goberno central cambios en distribución das cotas pesqueiras

O conselleiro do Mar, Alfonso Villares, apoiou as demandas do sector pesqueiro galego e reclamou ao Goberno central "cambios na política de cotas pesqueiras" que permitan garantir a sustentabilidade ambiental dos caladoiros, así como a viabilidade económica da actividade pesqueira.

Segundo informou a Xunta, o titular de Mar remarcou a actuación do Executivo galego na "defensa dos intereses" da pesca galega coa presentación de alegacións ás resolucións da Secretaría Xeral de Pesca nas que se recollían propostas concretas que permitían mellorar a repartición de TACs actual.

Villares lembrou que a repartición de cotas acordado no Consello de Ministros de Pesca da Unión Europea a finais do ano pasado foi unha "oportunidade perdida", especialmente, continuou, se se ten en conta que nese momento España ostentaba a presidencia rotatoria do Consello da UE. "Así o manifestamos en Bruxelas durante as negociacións que non supuxo ningunha mellora á proposta inicial da propia Comisión", explicou.

Ademais, resaltou que a Administración autonómica traballa nunha proposta que leve a racionalizar a determinación de TAC e cotas sobre especies que poden ser "estranguladoras da actividade pesqueira" e "non teñen perigo real de colapso" das poboacións.

Por todo iso, a Xunta criticou que "se cargue nos axustes constantes á actividade da frota a mellora do estado cos caladoiros comunitarios a pesar dos indicios de sustentabilidade ambiental que despois non teñen traslado efectivo á propia actividade pesqueira".

Tamén reclamou unha revisión da implantación de TAC plurianuais seguindo pautas de equilibrio e non a baixa así como que estas sexan debatidas coas comunidades autónomas co obxectivo de achegar datos que permitan alzas e novos axustes.

O conselleiro do Mar, Alfonso Villares. XUNTA DE GALICIA