Amosa unha placa falsa de Garda Civil e tenta agredir a un conductor tras unha discusión de tráfico
Por Europa Press / Redacción | VIGO | 27/08/2024 | Actualizada ás 12:03
A Garda Civil da Guarda investiga a un home de 64 anos de idade, veciño de Barcelona e cunha segunda residencia nesta localidade do Baixo Miño, como presunto autor dos delitos de ameazas, usurpación de funcións públicas e falsidade documental.
Segundo informaron fontes da Comandancia de Pontevedra, os feitos ocorreron o pasado 22 de agosto, cando se produciu unha discusión de tráfico entre dúas persoas no centro urbano da Guarda.
Un dos implicados exhibiu o que parecía unha placa de Garda Civil e supostamente ameazou e tentou agredir ao outro condutor. No lugar presentáronse axentes de Garda Civil e de Policía Local, xa que recibiran un aviso de que esa persoa se ía conducindo de forma errática.
Unha vez no punto, o sospeitoso foi interceptado e saíu do vehículo tratando de escapar, aínda que foi finalmente alcanzado. A patrulla de Garda Civil interveulle a documentación falsa e a Policía Local instruíu dilixencias porque o home se negou a someterse á proba de alcoholemia, e inmobilizoulle o vehículo. Ademais, o outro condutor presentou denuncia por un suposto delito de ameazas. As dilixencias practicadas foron postas en coñecemento do xulgado de garda de Tui.
