Publicado o baremo provisional do concurso de PSX e de técnico en coidados auxiliares de enfermaría
As prazas non cubertas a través das quendas de promoción interna e de discapacidade xeral acumularanse á quenda libre
Por Europa Press / Redacción | SANTIAGO DE COMPOSTELA | 05/09/2024 | Actualizada ás 17:44
O Diario Oficial de Galicia (DOG) publica este xoves as puntuacións provisionais da fase de concurso dos procesos selectivos, convocados mediante o sistema de concurso-oposición, para o ingreso nas categorías de persoal de servizos xerais (PSX) e técnico en coidados auxiliares de enfermaría (TCAE).
Do total das persoas aspirantes presentadas, 13.162, superaron a fase de oposición un total de 11.260 persoas. Na categoría de técnica en coidados auxiliar de enfermaría (TCAE) aprobaron 7.539 persoas nas quendas libre, promoción interna e discapacidade xeral. Ofértanse un total de 775 prazas para esta categoría, das cales 337 corresponden á quenda de acceso libre, 395 a promoción interna e 43 a discapacidade xeral.
Na categoría de persoal de servizos xerais (PSX) superaron a fase de oposición 3.643 aspirantes que concursan para 182 prazas, das cales 76 corresponden á quenda de acceso libre, 97 a promoción interna e 9 a discapacidade xeral.
As prazas non cubertas a través das quendas de promoción interna e de discapacidade xeral acumularanse á quenda libre.
Realizáronse exercicios diferenciados para a quenda de acceso reservado a persoas que acrediten discapacidade intelectual, na cal superaron a fase de oposición 65 persoas na categoría de persoal de servizos xerais (PSG) que concursan para 14 prazas, e 13 na categoría de técnica en coidados auxiliares de enfermaría (TCAE) na cal se ofertan 14 prazas.
As puntuacións provisionais da fase de concurso obtidas polos aspirantes que superaron a fase de oposición do proceso selectivo atópanse publicadas, a disposición das persoas interesadas, na páxina web do Sergas.
