O pleno de Mondariz elixirá novo alcalde o vindeiro xoves, pero AxM non se postulará

O pleno do Concello de Mondariz elixirá novo alcalde o vindeiro xoves, día 26 de setembro, ás 08.30 horas da mañá, pero o anterior partido de goberno (que dimitiu a semana pasada) e lista máis votada nas eleccións de 2023, Alternativa por Mondariz (AxM), non se postulará, polo que previsiblemente será o PP quen se faga co bastón de mando da devandita localidade pontevedresa.

Así o sinalou o exalcalde Xoán Carlos Montes ('Calis'), quen dixo que "baixo ningún concepto" o seu partido volverase a presentar neste pleno, engadindo que "votarán en contra de calquera outro candidato". "Nin a favor nin abstención, votaremos en contra de calquera", insistiu. A pesar disto, en declaracións a Europa Press, explicou que, no caso de que a oposición non se poña de acordo, será a segunda lista máis votada a que se faga co goberno local de Mondariz. Neste caso, serían os 'populares', sempre que eles si presenten un candidato a rexedor.

Cabe lembrar que AxM conta con cinco concelleiros, que dimitiron a semana pasada polo "bloqueo" por parte da oposición. Oposición formada por tres concelleiros do PP, dous do BNG e un do PSOE. Pola súa banda, a cabeza de lista do BNG, Xosé Emilio Barros, dixo que os nacionalistas tampouco prevén presentarse como alternativa de goberno. "Entendemos que non debemos de ser nós quen lidere", subliñou en declaracións a Europa Press.

El espera que AxM si presente un candidato que, ao seu xuízo, non debería ser Montes. A pesar de todo, criticou que, tras a dimisión, os cinco concelleiros mantivesen as súas actas, no canto de deixar correr a lista e permitir que outros edís entrasen no Concello para tratar de desbloquear a situación. Pola súa banda, a socialista Violeta Lois anunciou nas últimas horas que pretende postularse a alcaldesa. A pesar de que o PSOE só ten un edil, espera contar co apoio tanto do BNG como de AxM, para formar un "goberno de esquerdas" e impedir que o PP chegue ao poder.

FEITOS

Nas últimas semanas, o equipo de 'Calis', cun goberno en minoría, levaba días advertindo de que ese "bloqueo absoluto" de PP (3 concelleiros), BNG (2 concelleiros) e PSdeG (unha representante) puña en risco a estabilidade do municipio, e ante a falta de acordo para aprobar os orzamentos municipais, o rexedor apelou ao "sentido da responsabilidade" do resto de grupos.

Alternativa por Mondariz pediu a nacionalistas, 'populares' e á concelleira socialista abrir unha vía de negociación para aprobar as contas e dar luz verde a un plan de pago da débeda a 14 anos. Non poder contar con orzamentos, advertía, provocaría a intervención do Concello por parte do Estado e a obrigación de devolver a débeda en 5 anos, "o que suporá a asfixia total" de Mondariz.

Por iso, o goberno local ofreceu á oposición renunciar á segunda dedicación proposta nos orzamentos e repartir a do alcalde entre catro, con tres tenencias de alcaldía. Nunha carta enviada aos grupos. Ante a falta de contestación, o goberno de Mondariz decidiu renuncia, aínda que mantendo as actas de concelleiras. Este xoves, Mondariz terá que elixir novo alcalde.

Xoán Carlos Montes Bugarín, ex alcalde de Mondariz | Fonte: CONCELLO DE MONDARIZ - Arquivo