O BNG lanzará en Ourense unha campaña informativa para un novo modelo de financiamento para Galicia

O Bloque Nacionalista Galego presentou este martes en Ourense unha nova campaña a favor dun modelo de financiamento para Galicia baixo o lema 'Galiza coa chave dos seus cartos'.

A encargada de explicalo foi a deputada Noa Presas, quen indicou que co modelo actual de financiamento Galicia "sae perdendo". Segundo os últimos datos de liquidación, do ano 2022, "reflíctese que o Estado recadou máis de 15.000 millóns de euros dos galegos", mentres que a comunidade autónoma "só recibiu 10.000 millóns", dixo.

"Falamos de como se nutren as arcas públicas e de como se financian os nosos servizos públicos esenciais", manifestou Presas, expondo que o modelo actual "afecta directamente as arcas públicas galegas", o que se ve reflectido en "menos recursos para prestar servizos e construír infraestruturas que son necesarias para a cidadanía", como os investimentos en sanidade ou educación.

A nacionalista sinalou que a relación económica co Estado é así desde o 2009 e debería revisarse no 2014, cousa que afeou que non se fixo nin nos gobernos do Partido Popular nin nos gobernos co Partido Socialista, que "atrasaron este debate, conxelándoo co modelo actual" de financiamento.

A deputada no Parlamento galego trasladou que, segundo o informe do Consello de Contas, entre 2009 e 2021 Galicia "perdeu máis de 20.000 millóns de euros", o que indica que perde cada ano máis de 1.000 millóns.

Para tratar este tema propoñen unha campaña informativa con varios actos públicos onde trasladarán propostas á cidadanía en distintos concellos ourensáns como O Carballiño ou Barbadás, que é o único concello con data xa asegurada --o martes 29 de outubro--. Tamén repartirán folletos e cartelaría a través de mesas informativas noutras zonas da comarca como en Pereiro de Aguiar, onde estarán presentes leste mesmo xoves

Noa Presas, en rolda de prensa | Fonte: BNG