O SLG reclama que a Xunta tome medidas ante as "enormes perdas" na recollida de pataca na Limia
O Sindicato Labrego Galego-Comisións Labregas (SLG-CCLL) explica que "as choivas da primavera atrasaron a plantación do cultivo de pataca, polo que o ciclo de cultivo tamén se atrasou para poder recoller as leiras cultivadas"
Por E.P. | SANTIAGO DE COMPOSTELA | 16/10/2024 | Actualizada ás 18:43
O Sindicato Labrego Galego-Comisións Labregas (SLG-CCLL) instou a Medio Rural a "traballar en medidas" para "corrixir as enormes perdas" económicas provocadas como consecuencia das condicións climatolóxicas que "complican a recollida da pataca" na Limia.
"O ano agrícola empezou mal e pode acabar peor. As choivas da primavera atrasaron a plantación do cultivo de pataca, polo que o ciclo de cultivo tamén se atrasou para poder recoller as leiras cultivadas", explicou o responsable do SLG na comarca da Limia, Anxo Pérez Rúa.
Nun comunicado detallou que, as choivas persistentes do outono "dificultan" a recollida das patacas con maquinaria pesada, nuns casos porque o avance das máquinas é "moito máis lento" do habitual e noutros porque a "excesiva humidade" das leiras fai "moi complexa" a entrada das máquinas.
"Nótase a ansiedade na comarca", lamentou, xa que a climatoloxía non dá tregua e os gastos que está investidos na terra "establécense entre 6.000 e 8.000 euros por hectárea".
