Abel Losada critica á Xunta por non declarar a emerxencia por temporais e dificulte acceder ás axudas estatais
Así o defendeu o subdelegado do Goberno en Pontevedra mentres visitaba a "zona cero" do incendio que arrasou o pasado mes de setembro 300 hectáreas no Concello de Crecente
Por E.P. | SANTIAGO DE COMPOSTELA | 16/10/2024 | Actualizada ás 19:12
O subdelegado do Goberno en Pontevedra, Abel Losada, referiuse este mércores para os efectos que deixou na provincia o temporal Kirk e lamentou que a Xunta non declare a emerxencia ante estas situacións. Ante esta conxuntura, afeou ao Executivo galego que trate os temporais como "emerxencias de nivel local", dificultando así que os concellos poidan acceder ás axudas estatais.
Así o defendeu mentres visitaba a "zona cero" do incendio que arrasou o pasado mes de setembro 300 hectáreas no Concello de Crecente, concretamente nas parroquias de Filgueira e A Ameixeira. Alí, celebrou xunto ao rexedor, Julio César García, a declaración de zona afectada por emerxencia.
Neste sentido, Losada destacou que o Consello de Ministros aprobou recentemente a declaración de 176 territorios en practicamente todas as comunidades autónomas como zonas "gravemente afectadas" por emerxencias de protección civil, coloquialmente coñecidas como "zonas catastróficas".
Segundo explicou nunha nota de prensa a subdelegación do Goberno en Pontevedra, na provincia beneficiáronse tanto Crecente como Tomiño ao declararse previamente a emerxencia en Galicia por parte da Xunta, polo efecto do lume no caso do municipio da Paradanta e por un accidente nunha empresa no Baixo Miño.
Así mesmo, o subdelegado subliñou que "nos próximos meses" o Ministerio de Política Territorial publicará a convocatoria pola que Crecente poderá presentar a documentación que acredite os prexuízos sufridos polos veciños e polo Concello e así, "acceder aos fondos estatais".
