Unha nova fronte deixa aviso amarelo por vento e temporal costeiro en varios puntos de Galicia

A chegada dunha fronte activa para este domingo o aviso amarelo por vento e temporal costeiro en varios puntos de Galicia, segundo Meteogalicia. Así, a zona da Mariña estará en aviso por ventos con refachos que poden superar os 80k/h en zonas elevadas. Pola súa banda, o noroeste da Coruña e a Costa da Morte estarán en alerta por temporal costeiro.

Durante a xornada do domingo, Galicia estará na influencia dunha profunda borrasca centrada sobre as illas británicas que traerá unha fronte activa que, segundo o previsto, tocará terra ao noroeste co avance da noite.

Por iso, na metade oeste estará un día de ceos moi anubrados, con choivas, mentres nas provincias de Lugo e Ourense o ceo estará parcialmente cuberto, sen choivas. En canto ás temperaturas, as mínimas non terán cambios significativos e as máximas sufrirán un lixeiro ascenso. O vento soprará do suroeste moderado con refachos fortes en zonas altas do norte.

Unha muller cóbrese coa carapucha durante a fronte meteorolóxica, a 23 de febreiro de 2024, na Coruña | Fonte: M. Dylan - Arquivo