Unha lectura continuada de 'Memorias dun neno labrego' conmemora o 96 aniversario do nacemento de Neira Vilas

O secretario xeral de Lingua, Valentín García, participou nas homenaxes ao autor Xosé Neira Vilas coincidindo coa celebración do 96 aniversario do seu nacemento. Nos actos, que se levaron a cabo na sede da Fundación que leva o seu nome, fíxose unha lectura continuada de 'Memorias dun neno labrego', "unha das obras máis universais da literatura galega e, de feito, a máis traducida e editada".

Segundo trasladou a Xunta, o representante de Cultura felicitou á Fundación Neira Vilas polo labor que desenvolve e que "segue mantendo vivo o recordo e o espírito dun dos máis grandes escritores das letras galegas". Neste sentido, Valentín García destacou a figura do crucense, que "grazas a actividades como as de hoxe, pomos de manifesto o valor que deu e continúa dando á literatura da nosa terra e ao uso da nosa lingua". No marco deste acto, o secretario xeral sinalou que, coincidindo con esta data, a Consellería de Cultura festexa tamén o Día da lectura.

Novela gráfica de 'Memorias dun neno labrego', adaptación de Iria Aldegunde do clásico Xosé Neira Vilas. EDITORIAL GALAXIA