Publicada a baremación definitiva para acceder a condición de persoal estatutario fixo de enfermaría de saúde mental
Ofértanse un total de 94 prazas mediante o sistema de concurso, das cales 65 corresponden á quenda de acceso libre, 24 a promoción interna e 5 a discapacidade xeral. A media de idade das persoas admitidas neste proceso selectivo é de 37 anos e o 92 % son mulleres.
Por Europa Press / Redacción | SANTIAGO DE COMPOSTELA | 07/11/2024 | Actualizada ás 14:05
O Diario Oficial de Galicia publica na súa edición deste xoves a resolución da Dirección Xeral de Recursos Humanos do Sergas pola que se fai pública a baremación definitiva e as persoas aspirantes que resultaron seleccionadas no proceso selectivo, polo sistema de concurso, para o ingreso na condición de persoal estatutario fixo na categoría de enfermeiro especialista en saúde mental.
Ofértanse un total de 94 prazas mediante o sistema de concurso, das cales 65 corresponden á quenda de acceso libre, 24 a promoción interna e 5 a discapacidade xeral. Estas 94 prazas engádense ás 31 prazas ofertadas no proceso selectivo mediante o sistema de concurso-oposición (exame realizado o pasado mes de febreiro) e ás dúas prazas ofertadas no proceso selectivo de estabilización, polo sistema de concurso de méritos. Neste proceso selectivo resultaron admitidos 138 aspirantes, dos cales 131 accederon pola quenda de acceso libre, 3 por discapacidade xeral e 4 pola quenda de promoción interna.
Este proceso selectivo convocouse en aplicación a Lei 2/2022, do 6 de outubro, de medidas extraordinarias dirixidas a impulsar a provisión de postos de difícil cobertura de determinado persoal estatutario con título de especialista en ciencias da saúde do Sergas en materia de emprego público dirixidas a garantir a adecuada atención sanitaria de toda a poboación galega. As puntuacións definitivas obtidas polos aspirantes presentados ao proceso selectivo están publicadas, a disposición dos usuarios, na web do Sergas. Ademais, cada aspirante poderá consultar o detalle da puntuación obtida nos distintas epígrafes do baremo no seu expediente electrónico persoal. A media de idade das persoas admitidas neste proceso selectivo é de 37 anos e o 92 % son mulleres.
PRESENTACIÓN DE DOCUMENTACIÓN
Coa publicación desta resolución ábrese un prazo dez días hábiles contados a partir do día seguinte ao da publicación desta resolución (do 8 ao 21 de novembro), para que todas as persoas aspirantes que participaron no proceso presenten a seguinte documentación: declaración de non ser separado do servizo mediante expediente disciplinario de calquera servizo de saúde ou Administración pública, certificado médico e certificación do Rexistro Central de Delincuentes Sexuais e de Trata de Seres Humanos de non ser condenado por sentenza firme por algún delito contra a liberdade e indemnidade sexual.
Os aspirantes que accederon pola quenda de discapacidade xeral, de ser o caso, deberán presentar ademais a documentación que acredite que seguen mantendo esta condición. Co obxecto de facilitar a súa presentación, porase á disposición dos aspirantes, na páxina web do Sergas, no apartado de emprego público, os modelos de declaración e de autorización de consulta de datos no Rexistro Central de Delincuentes Sexuais e de Trata de Seres Humanos.
