Aprobadas declaracións institucionais desde a FEGAMP polo 25N e en solidariedade cos afectados pola 'DANA'

A federación galega de municipios e provincias (Fegamp) aprobou declaracións institucionais polo 25 de novembro, día contra a violencia machista, e en solidariedade cos afectados pola 'DANA', na xunta de portavoces celebrada este martes. Nun comunicado, a Fegamp condena "o asasinato de Ronsel Blach en Baiona" e traslada o seu apoio e solidariedade á familia da vítima, e confía en que "o asasino sexa detido e xulgado o máis pronto posible".

"Teñen que reforzarse a condena da violencia machista en todas as súas manifestacións e o traballo colectivo na construción dun presente no que ningunha muller sexa vítima desta violencia", afirma. A declaración institucional da Fegamp polo 25N comeza condenando o recente crime e reafirma o seu compromiso para pór fin á violencia contra as mulleres, "un obxectivo irrenunciable e prioritario".

Dentro da violencia contra as mulleres, sinala á "violencia económica", vicaria, dixital, a cousificación na pornografía e a prostitución en que mulleres son "obrigadas a ser escravas sexuais". Apela a todas as administracións e á coordinación para "promover avances" na loita contra a violencia machista e a protección das vítimas". Por último, fai un chamamento a que se denuncien "todas as formas de violencia contra as mulleres" e que se acaben "os silencios cómplices".

AFECTADOS POLA 'DANA'

Por outra banda, os portavoces da Fegamp tamén aprobaron unha declaración en apoio aos veciños e concellos afectados pola 'DANA'. Fronte a esa "inmensa situación de emerxencia", incide en que "na primeira liña de intervención" estiveron protección civil e emerxencias, as forzas e corpos de seguridade do Estado e os propios concellos afectados, "como administración máis próxima".

"Desde que se tiveron as primeiras informacións da catástrofe, contactouse coas federacións homólogas da Comunitat Valenciana e de Castela A Mancha, para trasladarlles a nosa solidariedade e pornos á súa disposición no que puidésemos colaborar", resalta. O municipalismo galego, subliña, "vai manter o seu apoio aos concellos afectados e aos seus veciños".

A XUNTA ASEGURA QUE ACHEGARÁ "MÁIS FONDOS QUE NUNCA AOS CONCELLOS"

O portavoz do PPdeG na Federación Galega de Municipios e Provincias (Fegamp) e alcalde de Poio, Ángel Moldes, respondeu ás acusacións do presidente do organismo, o socialista Alberto Varela, e prometeu que a Xunta achegará "máis fondos que nunca para os concellos". En concreto, serán 641 millóns de euros nos Orzamentos de 2025.

O presidente da Fegamp sinalara a pasado fin de semana, en declaracións á Cadena Ser, á Xunta como culpable da situación económica de diferentes municipios galegos pola falta de financiamento. Ante esta denuncia, o alcalde de Poio expuxo que Varela "non acepta nunca nin unha soa solución que proveña do Goberno autonómico".

Por outra banda, o popular expuxo que "o único que fai" Varela "constantemente é botar a culpa á Xunta de Galicia e en ningún caso ao Goberno central". Ademais, asegurou que, fronte ao 25 % do Estado, a Administración autonómica incrementou os fondos destinados aos concellos nun 35 %. Con todo, desde o PPdeG manifestan ser conscientes de que moitos municipios están a atravesar dificultades económicas. Por iso, "é necesario que o debate non quede contaminado por un partidismo estéril" dixo Moldes.