María Loureiro, a catedrática que realizou a avaliación económica dos danos do Prestige, Premio María Josefa Wonenburger

O pleno da Unidade da Muller e da Ciencia da Xunta de Galicia decidiu outorgar, por unanimidade, o Premio María Josefa Wonenburger Planells á catedrática de Fundamentos de Análise Económica da Universidade de Santiago de Compostela, María Loureiro. Tal e como destacou a administración autonómica nunha nota de prensa, este galardón pretende recoñecer o seu labor na investigación sobre a enerxía, a economía ambiental e agrícola.

María Loureiro (A Pontenova, Lugo, 1972) é licenciada en Economía pola Universidade de Santiago de Compostela (USC) e doutora pola Washington State University. Desde o ano 2010 é Catedrática de Fundamentos da Economía na USC. Ademais, foi profesora titular na Colorado State University e na Carlos III de Madrid. Este premio busca recoñecer o seu labor no ámbito da investigación, onde conta con traballos, entre outros, sobre a avaliación económica dos danos ambientais do Prestige e que foi utilizado pola propia Fiscalía no proceso de reclamación de danos.

Ademais, nestes momentos, traballa nun proxecto sobre a Economía do cambio climático: vulnerabilidade e políticas de adaptación e mitigación en España. Así mesmo, destacouse tamén que María Loureiro forma parte da Real Academia Galega das Ciencias desde o ano 2022. Concretamente, a investigadora é a primeira muller académica numeraria da Sección de ciencias Económicas e Sociais. Ademais, a Xunta sinala que o seu traballo a converte nunha das científicas máis influentes do mundo.

Pleno da Unidade da Muller e da Ciencia da Xunta | Fonte: XUNTA