Radiografía da industria cultural: hai máis libros pero expórtanse menos cultura "made in Galicia"
O Consello da Cultura apunta a un aumento do gasto cultural das familias.
Por Europa Press / Redacción | SANTIAGO DE COMPOSTELA | 13/11/2024 | Actualizada ás 13:12
A oitava edición de conxuntura do Observatorio da Cultura Galega, dependente do Consello da Cultura Galega, destaca unha "estabilidade" no sector no que vai de 2024 nas cifras de emprego e creación de empresas, similares aos datos de 2023.
Este estudo apunta a unha tendencia positiva na produción, particularmente na de libros --coa mellor cifra desde 2011--, así como en asistencia a salas de cinema e gasto cultural das familias. Entre os puntos negativos, as cifras de exportación de produtos culturais mostran un retroceso.
O emprego no sector cultural galego é de 36.800 persoas, "practicamente a mesma cifra" que hai un ano, cun lixeiro incremento de afiliacións polos autónomos, que representan o 45% do total. O número de empresas creadas en 2024 son 135, catro menos que no mesmo período de 2023 --A Coruña e Pontevedra mantéñense co maior dinamismo--.
Por datos de actividade, a educación cultural, o deseño especializado e os servizos de arquitectura son as que rexistran "aumentos sostidos", o que contrasta coa baixada de afiliacións en actividades de fabricación de produtos culturais e axencias de noticias. Tamén se aprecia unha volta progresiva do público a cinemas tras a pandemia, con 3,2 millóns de espectadores ao longo de 2023 fronte aos 1,2 millóns de 2020.
GASTO
No tocante a gasto de administracións, os orzamentos de cultura e normalización lingüística da Xunta elévanse a 116,6 millóns en 2024, un 1,3% máis. Iso si, inferior ao aumento do gasto global e un peso sobre o global de só o 0,8%. O gasto en cultura de entidades locais galegas elevouse de 233,6 millóns a 241,5 millóns. Con todo, en termos relativos, a proporción do gasto cultural rebaixouse do 7,6% ao 6,7%.
Polo que respecta ao gasto de familias en produtos culturais, o informe sostén que hai un aumento ata superar os 500 millóns en 2023, un 1,38% do gasto total. O maior gasto vaise para entradas a espectáculos e servizos (151,7 millóns, 55 millóns máis que o ano anterior), seguido de libros (118,2 millóns). A compra de prensa segue a súa tendencia decreciente.
