De facilitar limpezas a áreas de inundación controladas en urbes: así prevé a Xunta evitar enchentes e inundacións
O Goberno galego analizou este luns, na súa reunión semanal e co transfondo dos efectos da DANA en Valencia, un informe que analiza as actuacións nas que traballa para previr alagamentos e que van desde pasos normativos a proxectos como crear áreas de inundación controladas en zonas urbanas.
Por Europa Press / Redacción | SANTIAGO DE COMPOSTELA | 18/11/2024 | Actualizada ás 14:50
O Goberno galego analizou este luns, na súa reunión semanal e co transfondo dos efectos da DANA en Valencia, un informe que analiza as actuacións nas que traballa para previr alagamentos e que van desde pasos normativos, como autorizar a limpeza e adecuación de espazos fluviais cunha simple declaración responsable, a proxectos como crear áreas de inundación controladas en zonas urbanas.
As distintas iniciativas foron detalladas nunha comparecencia ante os medios tanto polo presidente autonómico, Alfonso Rueda, como pola conselleira de Medio Ambiente e Cambio Climático, Ángeles Vázquez, posterior á reunión semanal do Executivo, que este luns se produciu na Cámara autonómica, onde un pleno acolle o debate de totalidade tanto do proxecto de lei de Orzamentos para 2025, como da norma de medidas fiscais e administrativas que a acompaña. Nesta conxuntura, a Xunta concretou que prevé mobilizar o ano próximo máis de 35 millóns na planificación e posta en marcha de actuacións fronte aos riscos de inundación no ámbito da conca hidrográfica Galicia Costa.
O paquete de actuacións inclúe desde pasos encamiñados a evitar ou minimizar os desbordamentos (favorecendo por vía lexislativa as limpezas, endurecendo sancións ou rebaixando os informes e trámites necesarios para realizar obras necesarias) e a creación de áreas de inundación controladas en zonas urbanas, espazos deseñados para reter grandes cantidades de auga en casos de choiva intensa e con capacidade para integrarse en futuros corredores verdes. Vázquez subliñou que en 2024 se efectuou a limpeza de ríos nunha área duns 500 quilómetros, considerada a máis prioritaria, pero recalcou a necesidade de seguir traballando no ámbito da prevención e da planificación. E feito, esgrimiu que o Plan de xestión do risco de inundación no que se traballa para o horizonte 2028-203 elevará a 172 as áreas de risco e pasará de 548 quilómetros a 566.
