Cachan a un gandeiro de Castroverde cun corzo en catividade sen autorización
Ao ser preguntado o responsable, este recoñeceu que non ten permiso para ter o corzo, e explicou que o atopou no monte.
Por Europa Press / Redacción | LUGO | 19/11/2024 | Actualizada ás 15:27
A Garda Civil rescatou un exemplar de corzo localizado nun recinto pechado con chapas metálicas, nunha explotación gandeira de Castroverde, e denunciou ao responsable, que non ten autorización para ter a este animal en catividade. Os axentes localizaron o corzo durante unha inspección nunha explotación gandeira, e comprobaron que o animal estaba oculto nun recinto pechado con chapas metálicas. Ao ser preguntado o responsable, este recoñeceu que non ten permiso para ter o corzo, e explicou que o atopou no monte.
A Garda Civil formulou denuncia pola tenencia dun animal silvestre sen autorización, unha infracción tipificada na lei 5/2019, do Patrimonio Natural e da Biodiversidade de Galicia, en concordancia coa Lei 4/2017 de protección e benestar dos animais de compañía de Galicia. Así mesmo, os axentes procederon á intervención cautelar do corzo, que quedou a disposición da Xefatura Territorial da Consellería de Medio Ambiente e Cambio Climático da Xunta de Galicia en Lugo e, posteriormente, foi trasladado por axentes ambientais ao centro de recuperación de fauna silvestre do Veral, para determinar a súa posible reintroducción ou liberación, se é o caso, ao medio natural do cal procede. O corzo aparece na relación de especies cinexéticas de Galicia segundo a resolución do 27 de marzo de 2024 da Dirección Xeral de Patrimonio Natural, pola que se determinan as épocas hábiles de caza, as medidas de control por danos e os réximes especiais por especies durante a tempada 2024-2025.
