Medio Ambiente tras denuncias de ecoloxistas do Deza por contaminación: "Se un proxecto ten o noso aval é que se pode permitir"

A conselleira de Medio Ambiente e Cambio Climático, Ángeles Vázquez, pediu "sensatez" ante a proliferación de denuncias de "certas organizacións" en "absolutamente todo e para todo", reivindicando que se un proxecto ten o aval da Xunta é que "se pode permitir". Todo iso tras ser preguntada pola denuncia de ecoloxistas na comarca do Deza, que aseguran que hai unha alta contaminación por nitratos en augas superficiais. Dixo que cada vez que hai unha declaración de impacto ambiental fanse todos os estudos necesarios no chan e defendeu que os ríos galegos están "en moi boa situación".

"A partir de aí, xa sabemos que proliferan denuncias de certas organizacións absolutamente en todo e para todo. Eu o que pido é un pouco de sensatez porque detrás de cada proxecto hai un grande investimento e uns estudos que contrastamos cientificamente e que pode estar seguro a xente que está no territorio de que se ten o aval da Xunta a través de Medio Ambiente é que se pode permitir", reivindicou.

LEI DE ADMINISTRACIÓN AMBIENTAL SIMPLIFICADA

Entre outras cousas, a conselleira tamén foi preguntada sobre a lei de administración ambiental simplificada que prepara a Xunta para reducir os trámites ás compañías que se queiran implantar na Comunidade. Ela explicou que non só estará dirixida ás explotacións gandeiras, "senón a calquera instalación ou empresa ou obra que se faga no territorio".

Engadiu que con esta normativa preténdese "seguir os pasos de Europa", que di que hai que "conservas e preservar" e cumprir coa lei, pero ser "claros", o cal tamén dá "seguridade xurídica". Para Vázquez, "non é fácil", pero "vaise a conseguir", para "simplificar e reducir prazos". "Non é posible que calquera tipo de instalación entre que presenta o proxecto e damos a autorización estean a esperar máis dun ano ou mesmo dous anos", sentenciou.

A conselleira de Medio Ambiente e Cambio Climático, Ángeles Vázquez, en rolda de prensa tras o Consello da Xunta | Fonte: XUNTA - Arquivo