O prezo da vivenda sobe un 10,8% interanual en novembro en Galicia, segundo Fotocasa
Galicia está entre as comunidades máis afectadas pola suba de prezos, xunto con Madrid e Baleares.
Por Europa Press / Redacción | Santiago de Compostela | 07/12/2024 | Actualizada ás 19:41
O prezo da vivenda en Galicia subiu un 10,8 por cento en novembro con respecto ao mesmo mes do ano anterior, segundo os datos do índice inmobiliario Fotocasa. No conxunto do país, o prezo da vivenda subiu un 9,6 por cento interanual no mes de novembro en España, que destacou por ser a variación máis alta do ano.
Este incremento provocou que España pasase dunha variación interanual do 6,2% de novembro de 2023 ao 9,6% detectado no mesmo mes deste ano, situando o prezo do metro cadrado nos 2.380 euros.
"Factores como o crecemento demográfico, o auxe de fogares unipersonales, o turismo residencial e o interese investidor, xunto cun contexto económico favorable e a mellora salarial, intensificarán a demanda e, por tanto, a presión sobre a oferta, o que repercutirá nos prezos", explicou a directora de Estudos e portavoz de Fotocasa, María Matogueiras.
Os datos de Fotocasa tamén reflicten incrementos do prezo interanual de novembro en 16 comunidades autónomas, sendo superiores ao 10% en Madrid (20,6%), Comunidade Valenciana (20,3%), Baleares (19,2%), Rexión de Murcia (14,9%), Andalucía (13,9%), Canarias (13,7%), Galicia (10,8%) e Cantabria (10,4%).
Séguenlle as comunidades de Asturias (9,3%), País Vasco (6,4%), Estremadura (4,1%), Castela e León (3,7%), Castela-A Mancha (3,3%), Cataluña (1,6%), Navarra (1,6%) e Aragón (0,2%).
