O Festival de Cans abre o prazo de inscrición e aumenta a dotación económica en premios ata os 13.000 euros

O Festival de Cans, que celebrará a súa XXII edición do 20 ao 24 de maio de 2025, abriu o prazo de inscrición de obras para a súa competición oficial e, este ano, aumenta a dotación económica en varios premios ata chegar a preto dos 13.000 euros. Segundo informou a organización nun comunicado, tras o éxito do pasado ano, no que máis de 12.000 persoas pasaron pola parroquia ao longo dos cinco días de festival, Cans volverá repetir a fórmula do certame, que comezará o martes 20 e terá o seu día grande o sábado 24 de maio.

Desta forma, os autores que queiran participar xa poden inscribirse de forma gratuíta as súas curtametraxes, videoclips, webseries e longametraxes inéditas na plataforma gratuíta habilitada na web do Festival. A organización dará preferencia ás obras que sexan estreas absolutas, pero pode inscribirse calquera tipo de obra recente producida entre os anos 2024 e 2025.

Os premios máis relevantes serán: o premio do xurado ao mellor curto de ficción, dotado con 2.000 euros, o premio ao mellor curto de animación, dotado con 1.800 euros e os premios do público ou da categoría 'Furacáns de non ficción', dotados con 1.500 euros cada un. Así mesmo, haberá un premio de 1.000 euros na categoría 'Novas Camadas', destinada aos creadores de ata 25 anos.

Tamén, cada obra que reciba o premio do xurado nas categorías de ficción, animación e premio do público, recibirá unha dotación engadida de 300 euros en concepto de dereitos de difusión da súa obra no ciclo 'Cinemaldea'. O premio á mellor fotografía RC Service obterá 1.000 euros, que serán canxeables por material profesional de rodaxe. A convocatoria admite a inscrición de obras que non estean aínda completamente finalizadas, en fase de postproducción ou montaxe, na data límite de inscrición, o día 2 de marzo.