Tres galegas, dúas irmás de Muros e unha ourensá de Sandiás, atrapadas na illa de Mayotte polo ciclón 'Chido'
Teñen comida e, aínda que non hai auga corrente, si hai uns depósitos para que poidan collela, ademais puxeron un punto de recarga para o móbil.
Por Europa Press / Redacción | SANTIAGO DE COMPOSTELA | 19/12/2024 | Actualizada ás 14:10
Dúas irmás veciñas de Muros atópanse, xunto a Raquel Trigo, veciña do municipio ourensán de Sandiás, atrapadas na illa de Mayotte tras o paso do ciclón 'Chido'. Así o confirmou a Europa Press a alcaldesa deste municipio coruñés, María Lago, que explicou que, tras ter constancia do caso, farán xestións coa familia e tamén coas autoridades, neste último caso de cara a facer "un pouco de presión", sinalou en relación a saber da súa situación e a súa posible saída da illa.
Na mesma situación, atópase Raquel Trigo, veciña do municipio ourensán de Sandiás de 32 anos. O alcalde, Felipe Traveso, sinalou a Europa Press que do estado da moza teñen noticias polo que lles traslada a familia. "Parece que está en boas condicións, teñen comida e, aínda que non hai auga corrente, si hai uns depósitos para que poidan collela, ademais puxeron un punto de recarga para o móbil polo que puido falar coa súa familia", apuntou.
Das condicións nas que viven, sinalou que non hai luz, pero insistiu en que lle consta, tras conversacións coa Subdelegación do Goberno, que desde o Executivo central "está a traballarse". "Non é fácil porque a torre de control está derrubada e non poden saír avións", dixo ao limitar o transporte aéreo, polo que lle trasladaron, ao dalgún avión do Exército. "Espérase que se poida restablecer e ir á Illa de Pascua", sinalou no caso dos comerciais.
O paso deste ciclón deixou xa numerosos falecidos no norte de Mozambique, especialmente nas provincias de Cabo Delgado e Nampula. Unha cifra á que se suman os máis de 174.000 damnificados. Máis de 35.000 vivendas quedaron total ou parcialmente destruídas, segundo un reconto da Oficina para a Coordinación de Asuntos Humanitarios (OCHA) da ONU. O Fondo de Nacións Unidas para a Infancia (UNICEF) advertiu de que 90.000 nenos resultaron damnificados só na provincia de Cabo Delgado, onde polo menos 186 aulas quedaron destruídas e 20 instalacións sanitarias víronse tamén afectadas.
