Lugo convértese no 18° municipio galego 'libre de touradas'
Só dúas vilas galegas manteñen eventos tauromáquicos fronte aos 18 municipios e ás deputacións da Coruña e Pontevedra "abolicionistas".
Por Galicia Confidencial | Lugo | 25/02/2016 | Actualizada ás 22:25
O pleno do Concello de Lugo aprobou este xoves a moción da plataforma Galicia, Mellor Sen Touradas e da Asociación Animalista Libera para declarar o municipio 'libre de touradas', co compromiso de que o goberno non subsidiará ou apoiará esta clase de eventos, instando tamén á Xunta a derrogar a excepción legal que agora permite as corridas de touros na comunidade na Lei 1/93 de Protección dos Animais.
O texto, presentado polo grupo de goberno, do PSdeG, pon fin a unha campaña iniciada polos colectivos animalistas e abolicionistas que chegou a recoller perto de 15.000 sinaturas na plataforma de activismo dixital Change.org contou cos votos positivos do propio Partido Socialista e dos grupos municipais de Lugonovo, BNG e Alternativa Cidadá de Esquerdas, mentres que o Partido Popular e os dous edís de Ciudadanos abstivéronse, sumando 14 votos a favor e 11 abstencións.
Deste xeito Lugo converteuse no municipio número 18 en dar soporte á aposta cidadá por unha Galicia libre de touradas, manifestando unha postura clara tamén contra o uso de fondos de titularidade pública para apoiar espectáculos de tauromaquia.
Ademáis das dezaoito localidades que sumaron a esta rede, as deputacións da Coruña e Pontevedra aprobaron a finais de 2015 sendas iniciativas para bloquear calquera subsidio ás touradas, convertíndose nos únicos entes provinciais que se manifestaron contrarias á tauromaquia no conxunto do estado español.
