O plan autonómico en dependencia e discapacidade simplifica os trámites e abre unha vía preferente para maiores de 80

O plan de axilización e simplificación do acceso aos servizos de dependencia e discapacidade da Xunta de Galicia, que abre unha vía preferente para as persoas maiores de 80 anos, entra en vigor este mércores, informa a Xunta. O mesmo ten como obxectivo mellorar o acceso aos servizos, reducir os prazos e a burocracia e unificar os trámites da dependencia e a discapacidade. O plan aprobouse en Consello da Xunta o pasado 27 de decembro e supón un investimento de 90 millóns de euros. Tal e como sinalou a conselleira de Política Social e Igualdade, Fabiola García, conta con sete eixos principais.

Son, en concreto, reducir ao máximo a burocracia, fixar un procedemento conxunto que aforre tempos e trámites, a mellora da xestión das citas, a optimización da xestión administrativa, o reforzo do papel dos servizos sociais, o establecemento dun protocolo de colaboración entre Política Social e o Sergas e a posta en marcha dun plan de formación. Entre as novidades, está a unificación dos procedementos de dependencia e discapacidade. Así, poderase solicitar ao mesmo tempo e cunha única cita a dependencia e a discapacidade, que tamén se valorarán e resolverán á vez, emitíndose ao mesmo tempo o recoñecemento do grao de dependencia, a aprobación do Programa Individual de Atención (PIA) e a porcentaxe de discapacidade.

Atención á dependencia | Fonte: Arquivo