Decembro foi un mes cálido e moi seco en Galicia: 0,8 ºC por enriba do habitual e a metade de choiva
O valor medio da temperatura máxima foi de 11,8 graos, mentres que no caso da mínima foi de 4,7 graos.
Por Europa Press / Redacción | SANTIAGO DE COMPOSTELA | 08/01/2025 | Actualizada ás 14:38
Galicia rexistrou un mes de decembro calido, con case un grao máis de media de temperaturas, e moi seco, dado que as precipitacións foron un 55 % menos que os valores normais desta época do ano. Así o reflicte o último informe meteorolóxico elaborado por Meteogalicia, no que se indica que o último mes de 2024 tivo altas presións máis frecuentes ao que cabería esperar para a época do ano. Por iso, as choivas rexistradas estiveron "bastante por baixo do valor climatolóxico habitual".
En canto ás temperaturas, os valores medios estiveron próximos aos normais ou lixeiramente por enriba, xa que, aínda que durante os períodos anticiclónicos ocorreron importantes descensos térmicos durante as madrugadas, os valores diúrnos foron moi altos para un mes de decembro. Deste xeito, segundo os valores rexistrados nas estacións meteorolóxicas máis representativas, a anomalía media da temperatura media para este mes situouse nos 0,8 graos, polo que se trata dun decembro cálido.
En detalle, o valor medio da temperatura máxima foi de 11,8 graos, mentres que no caso da mínima foi de 4,7 graos. Os valores máis altos das temperaturas máximas rexistráronse preto das rías (nas áreas Padrón-Tui e na comarca do Salnés), con entre 14,7 e 15,3 graos. Os máis baixos das mínimas oscilaron entre os 0,7 e os 1,6 graos en gran parte do leste da provincia de Ourense.
MENOS CHOIVA
No relativo ás precipitacións, a choiva media acumulada durante o mes pasado foi de 86 litros por metro cadrado, un rexistro que reflicte que foron uns 55 % inferiores aos valores climáticos normais, polo que se pode considerarse un decembro moi seco. Os acumulados máis altos déronse nas serras litorais e no interior da provincia da Coruña, con valores entre os 180 e 220 litros por metro cadrado. A menor cantidade de precipitación, comprendida entre 10 e 20 litros por metro cadrado, rexistrouse na provincia de Ourense.
