Detidos dous homes como supostos autores de senllas 'ciberestafas' denunciadas en Lugo e Monforte
Por E.P. | LUGO | 15/01/2025 | Actualizada ás 11:02
Axentes da Policía Nacional de Lugo detiveron a dous homes, veciños de Quart de Poblet (Valencia) e Parla (Madrid), respectivamente, como supostos autores de delitos de estafa, cometida 'en liña', e que foron denunciados en Lugo e Monforte.
Segundo informaron fontes policiais, unha das estafas foi denunciada en Lugo, e a vítima explicou que recibira unha suposta chamada do seu banco para verificar o seu correo electrónico e teléfono asociado á súa conta bancaria. A continuación, facilitáronlle uns códigos de verificación que lle enviaron ao seu teléfono e, ao momento, observou que se lle realizaron tres cargos por importe de máis de 4.000 euros.
O presunto autor desta 'ciberestafa' foi localizado en Quart de Poblet, en Valencia, e foi detido pola Policía desa demarcación, a instancias da Comisaría Provincial de Lugo. Por outra banda, a Comisaría Local de Monforte instou a detención dun veciño de Parla, como suposto autor da chamada 'estafa do amor', a un veciño deste municipio lucense, ao que enganou para quitarlle case 3.000 euros.
Así, a vítima cría que lle estaba enviando diñeiro a unha médica de Iemen, para axudala a pagar un billete de avión para saír do país. Nos sucesivos contactos, o estafador foi conseguindo máis diñeiro con enganos, facendo crer á vítima que esta doutora necesitaba axuda económica para pasar a fronteira e mesmo para un ingreso hospitalario, o que foi o detonante que fixo sospeitar ao veciño de Monforte e pór unha denuncia.
