O Parlamento galego insta a demandar ao Goberno que promotores de enerxía vendan a empresas da contorna
Por E.P. | SANTIAGO DE COMPOSTELA | 17/01/2025 | Actualizada ás 16:04
O Parlamento galego instou á Xunta a comprometerse con todas aquelas medidas favorables ao binomio industria e enerxía xerada nos territorios e, en particular, "con todas aquelas que esixan aos promotores dos proxectos vender unha parte da enerxía xerada ás empresas da contorna". Así mesmo, o Goberno galego trasladará esta mesma demanda ao Executivo central, recolle tamén.
Foi nunha proposición non de lei presentada na Comisión de Economía celebrada este venres e que só contou co voto a favor do PP, que rexeitou a inclusión na súa totalidade dunha emenda presentada polos socialistas.
No texto, incídese nas modificacións lexislativas promovidas desde a Xunta para, entre outras cuestións, outorgar prioridade na tramitación e redución de prazos á metade a aqueles proxectos eólicos que subscribisen contratos PPA con empresas de Galicia e fornecésenlle parte da súa enerxía.
O deputado do PP Rubén Lorenzo asegurou que hai que traballar "para abaratar os custos da enerxía ás empresas". "Todos", sentenciou en referencia tamén ao Executivo central e á espera, engadiu, do "novo plan eólico".
A socialista Patricia Iglesias criticou a política da Xunta nesta materia e asegurou que o contrato PPA "foi deseñado para eludir as suspensións eólicas do Tribunal Superior de Xustiza de Galicia (TSXG)". Mentres, cualificou de política de "bandazos" as actuacións do Goberno galego e reclamou consenso.
Xosé Manuel Golpe, parlamentario do BNG, reclamou ao PPdeG explicar ao sector pesqueiro "a súa postura sobre a eólica mariña" e indicou que os nacionalistas se oporán mentres supoñan unha "ameaza" para a pesca. "Andamos polo 50% de exportación da electricidade e estamos a montar máis eólica para exportar máis", expuxo.
