Oito de cada dez compravendas de coches realízanse co financiamento como forma de pago

Oito de cada dez operacións de compra venda de vehículo realízase con mecanismos de financiamento, segundo trasladou o presidente da Asociación Nacional de Vendedores de Vehículos a Motor, Reparación e Recambios (GANVAM), Gerardo Cabanas, este mércores en Lugo. A sede de Asociación Provincial de Reparación e Venda de Automóbiles (Aprevar) en Lugo acolleu este mércores unha xornada informativa sobre o comportamento do mercado tanto de vehículos novos como de ocasión e as tendencias de compra, dirixida a profesionais e que estivo a cargo de GANVAM, a organización nacional do sector.

O presidente de GANVAM, Gerardo Cabanas, e do presidente de Aprevar, Luís Abelleira, puxeron o acento na necesidade de preparar unha estratexia a longo prazo para asegurar a continuidade dun sector que aínda non alcanzou as cifras de venda prepandemia, pero que se achega tras un 2024 no que volveu "superar o millón de unidades". Reafirmaron a necesidade de que "todo o mundo teña acceso á mobilidade" e para iso puxeron en valor as axudas que concede a Xunta para a renovación dos vehículos porque, segundo aseguran, "8 de cada 10 galegos manifestan que cambiarían de coche" con este tipo de incentivos.

Na presentación tamén destacaron a "importante" colaboración das entidades financeiras, xa que 8 de cada 10 operacións de compra-venda de vehículos realízanse con financiamento e avanzouse na necesidade de alcanzar o reto para este ano 2025 de impulsar o rexuvenecemento do parque móbil e acelerar o ritmo de descarbonización "e cumprir así coas esixencias europeas de redución de emisións". A inauguración do evento estivo a cargo do deputado provincial da área de Promoción Económica e Social, Pablo Rivera Capón, quen reafirmou o compromiso da Deputación de Lugo co sector, que cualificou como "fundamental para a economía de Lugo" e puxo en valor o labor de Aprevar en Lugo.

Recurso coches usados | Fonte: COCHES.COM - Arquivo