Convocadas protestas en varios concellos este domingo pra denunciar o "espolio enerxético" da Xunta
"Eólica Así non" demandará unha nova planificación real, con obxectivos sociais e ambientais e non en función dos intereses das enerxéticas.
Por Galicia Confidencial | Ourense | 03/02/2025 | Actualizada ás 10:53
A Coordinadora "Eólica Así Non" traslada para este domingo, 9 de febreiro, as mobilizacións polo Día Mundial da Enerxía Limpa, que tivo que suspender o pasado 26 de xaneiro por mor do temporal.
"A coordinadora fai un novo chamado á sociedade para denunciar o modelo de espolio enerxético que promove a Xunta de Galiza", indica nun comunicado. Así, sinala que o modelo eólico da Xunta non ten en conta os intereses da poboación e ten como principal obxectivo "beneficiar o capital, á costa de xerar graves impactos medioambientais e expulsar ás comunidades de afectados/as e a cidadanía en xeral da toma de decisións!,
A Coordinadora denuncia, ademais, a falta de respecto polas decisións xudiciais que demostra a Xunta de Galicia coa aprobación das últimas reformas legais. "Teñen como obxectivo dificultar que a poboación se poida defender, tanto no eido administrativo como xudicial, diante destes proxectos agresivos e depredadores do territorio, destinando recursos públicos para exercer violencia institucional contra as comunidades veciñais afectadas", engade.
Son, din, comunidades que sofren un continuo acoso administrativo a través da sobresaturación de proxectos, da desregulamentación e da xeración de inseguridade xurídica, difamando e criminalizando a protesta social. Por iso, Eólica Así Non! aposta por unha nova planificación eólica real, que ordene a explotación desta enerxía no territorio, con obxectivos sociais e ambientais, que faga partícipe ao pobo galego e non se desenvolva en función dos intereses das grandes multinacionais enerxéticas.
As distintas mobilizacións convocadas terán lugar en diversos concellos galegos:
Cartelle. Concentración na Alameda, ás 12h
Val do Dubra. Concentración diante do Concello de Bembibre, ás 12h
Mazaricos. Andaina ata o Castelo de Bradufe. Saída do Alto da Ruña ás 12h
Ortigueira. Andaina a Pena Ouseira. Saída no Bar A Rodela, ás 11h
Morrazo. Concentración diante do Concello de Marín, ás 12:30h
Pontevedra. Concentración na Praza da Peregrina, ás 11h
Campo Lameiro. Andaina. Saída na Escola de Couso, ás 16h
Sarria. Concentración no Cruce de Catro Camiños coa R/ da Liberdade, ás 12h
Lugo. Concentración diante do concello de Lugo ás 12h. Saída en manifestación ata o Multiusos da Xunta.
