A conselleira de Política Social pide a Pontón que "rexeite publicamente" o cartel "machista" da CIG

A conselleira de Política Social e Igualdade, Fabiola García, pronunciouse este martes sobre o cartel da CIG no que, mentres se reivindica máis persoal para residencias de maiores, aparece un debuxo, a modo de caricatura súa, dunha muller sentada nun sofá, cun bolso de marca e que afirma que lle "matan" as rebaixas. Ademais de pedir á CIG que "rectifique" a súa conduta "machista", apuntou á líder do BNG, Ana Pontón, á que insta a expresar o seu "rexeitamento público".

Así o trasladou no marco dunha entrevista con Onda Cero, recollida por Europa Press, nunha xornada na que Fabiola García recibiu o apoio de dirixentes do seu partido como a secretaria xeral, Paula Prado, ou o portavoz no Parlamento de Galicia, Alberto Pazos, pero tamén, por exemplo, da alcaldesa da Coruña, a socialista Inés Rey.

APOIOS

Rey, no seu perfil de IG, subliña que o "panfleto" é "noxento". "As cousas hai que chamalas polo seu nome. Máis aló da crítica política, penso que ningunha muller debe someterse a este nivel de machismo. Unha caricatura totalmente sexista que reflicte o que aínda hoxe sufrimos. Moito ánimo, Fabiola", traslada.

Tamén o conselleiro de Sanidade, Antonio Gómez Caamaño, ao finalizar un acto este martes na sede do seu departamento, aproveitou para mostrar publicamente a súa "máxima repulsa ante a campaña sexista" da CIG contra a súa compañeira de goberno. Ademais, dirixiu o foco cara ao BNG, partido que "lidera unha muller", para que se some ao rexeitamento a este cartel "nas proximidades do 8 de marzo".

Xa na pasada xornada responsables da Consellería de Política Social, entre elas a súa máxima responsable, pediron a retirada deste cartel, por "sexista". Fabiola García esgrimiu que se trata de "un acto vergoñoso" e confesou o que pensou na pasada xornada ao chegar á Consellería e ver que o edificio administrativo estaba "empapelado" cos carteis. "A un compañeiro, a un conselleiro home, faríanlle o mesmo?", preguntouse.

Tamén, tras a Xunta de Portavoces, Alberto Pazos acusou á oposición de "continuas faltas de respecto dos funcionarios" e cargou contra a "indignante e sexista" caricatura.