Prorrogada outros seis meses máis a investigación do 'Villa de Pitanxo'
Por Europa Press / Redacción | VIGO | 18/02/2025 | Actualizada ás 16:33
O titular do Xulgado Central de Instrución número 2 da Audiencia Nacional acordou unha nova prórroga de seis meses, ata principios do mes de setembro, do prazo de instrución para concluír a investigación en relación ao naufraxio do pesqueiro galego 'Villa de Pitanxo', afundido en febreiro de 2022 en augas de Terranova (Canadá).
Todo iso despois de que a finais de verán xa acordase unha prórroga, tamén de medio ano (ata inicios do próximo mes de marzo), ao non practicarse determinadas dilixencias acordadas nas actuacións, interesadas a instancia do Ministerio Fiscal e outras partes.
Agora, segundo informou a portavoz das familias dos falecidos, María José de Pazo, Moreno confirmou seis meses máis de investigación. Precisamente a semana pasada a Audiencia Nacional deu traslado ás partes personadas no caso da necesidade dunha nova prórroga da instrución á espera de que a Comisión Permanente de Investigación de Accidentes e Incidentes Marítimos (Ciaim) publique o seu informe sobre o ocorrido.
Esta nova prórroga chega uns días despois do terceiro aniversario da traxedia, mentres a investigación continúa para coñecer que ocorreu aquela madrugada nas xélidas augas do Atlántico Norte.
