O Supremo di que só se poden prohibir os pisos turísticos en comunidades de veciños se os estatutos o fixan expresamente

O Tribunal Supremo (TS) determinou que só se poden prohibir os pisos turísticos se as comunidades de propietarios así o fixan de forma expresa nos seus estatutos. Os maxistrados da Sala do Civil explican que "a mera descrición do inmoble, coa indicación do destino dos seus pisos ou locais, non supón unha limitación do uso ou das facultades dominicais, senón que a súa eficacia queda condicionada a que exista unha prohibición fundada nunha estipulación clara e precisa que a estableza".

Así se pronuncia o alto tribunal nunha sentenza, recollida por Europa Press, na que estuda un caso no que os estatutos só contemplaban prohibicións para consultorios, clínicas de enfermidades infecto contaxiosas e para fins ilegais, así como instalación de motores ou máquinas que non sexan usuais para os servizos do fogar, actividades inmorais, incómodas ou insalubres. A comunidade de propietarios levou o asunto aos tribunais porque quería que se declarase que a actividade de aluguer turístico da devandita vivenda era "contraria" aos estatutos porque se trata dunha "actividade molesta e incómoda".

Os xulgados de primeira instancia de Madrid desestimaron a demanda. Desconformes coa decisión, a comunidade de propietarios elevou o asunto á Audiencia Provincial de Madrid, que lle deu a razón e declarou que a actividade de aluguer turístico no devandito edificio incumpría os estatutos. Finalmente, o dono do inmoble acudiu ao Supremo. Agora, os maxistrados do alto tribunal resolven que neste caso non se prohibía nos estatutos de forma expresa o destino turístico dos pisos, polo que dan a razón ao propietario do inmoble en cuestión e non á comunidade de veciños.

Ademais, sosteñen que "dentro das actividades prohibidas nos estatutos non se atopa a que constitúe o obxecto deste proceso; é dicir, o aluguer turístico, cuxa explotación, tal e como vén desenvolvendo, segundo se declarou en primeira e segunda instancia tras a valoración da proba practicada, non conforma unha actividade incómoda ou molesta". Cómpre lembrar que en decembro de 2023 o Supremo xa deixou claro que tamén é válida a prohibición cando nos estatutos se veta expresamente que as vivendas se usen para exercer unha actividade económica, que neste caso tampouco se cumpría.

Cartel de Vivenda de Uso Turístico (VUT) | Fonte: Europa Press