Aberto o prazo para solicitar bolsas da Deputación da Coruña para investigación en estudos artísticos
O goberno provincial destaca o incremento nos últimos anos pasando dun total de 40 a 48 bolsas, así como a contía das mesmas, que pasou de 8.000 a 10.000 euros.
Por E.P. | SANTIAGO DE COMPOSTELA | 11/03/2025 | Actualizada ás 18:07
A Deputación da Coruña abriu este martes o prazo de solicitudes das bolsas para apoiar aos mozos na realización de proxectos de investigación en distintos campos de coñecemento e perfeccionamento de estudos artísticos durante o curso 2025-2026.
Ambas as convocatorias suman un orzamento de 480.000 euros para un total de 48 bolsas de 10.000 euros cada unha. O goberno provincial destaca o incremento nos últimos anos pasando dun total de 40 a 48 bolsas, así como a contía das mesmas, que pasou de 8.000 a 10.000 euros.
Este ano convócanse 20 bolsas de investigación, que pretenden ofrecer "apoio e oportunidades aos novos talentos coruñeses en diferentes ámbitos que van desde as ciencias da saúde, as ciencias sociais e xurídicas ou as humanidades", explicou o presidente provincial, Valentín González Formoso.
Ás bolsas, poderán optar persoas con titulación universitaria con menos de 36 anos de idade e residencia en calquera concello da provincia da Coruña, que deberán realizar un traballo de investigación durante un período mínimo de nove meses.
En concreto, convócanse cinco bolsas para proxectos sobre artes e humanidades; catro de ciencias da saúde; cinco de ciencias sociais, xurídicas ou estudos de xénero; catro de ciencias e dúas de enxeñaría e arquitectura.
