Educadores sociais concéntranse en varias localidades galegas en memoria da compañeira asasinada en Badaxoz
Chaman ás administracións a "reflexionar sobre o estado do sector" e a non "estigmatizar" aos menores do sistema de protección.
Por Europa Press / Redacción | SANTIAGO DE COMPOSTELA | 13/03/2025 | Actualizada ás 14:24
Centos de educadores sociais concentráronse este xoves en varias localidades galegas, entre elas Santiago, A Coruña e Ourense, en memoria da súa compañeira asasinada o luns nun piso tutelado Badaxoz por tres menores de idade --que foron detidos-- e en apoio aos seus achegados. O Colexio de Educadores Sociais de Galicia (CEESG) convocou ás 12.00 horas estas accións reivindicativas, que estiveron secundadas por universidades e sindicatos, e nas que tamén se mantiveron un minuto de silencio.
Así, o colectivo profesional trasladou publicamente o seu pésame á familia e aos compañeiros de Belén, á vez que fixo un chamamento para "reflexionar sobre o estado do sector", cunha "falta de recursos técnicos e económicos", e das "persoas" que traballan nel. Neste sentido, o Colexio de Educadores Sociais rexeita as informacións e voces que "estigmatizan ás nenas e nenos" que están no sistema de protección e que "confunden os centros de medidas xudiciais cos centros de protección". Con estas accións reivindicativas, o CEESG esixe ás administracións "unha avaliación exhaustiva dos recursos existentes para evitar que traxedias como a ocorrida en Badaxoz se repitan", así como a implementación de medidas "que reforcen tanto a seguridade como a calidade do traballo das profesionais".
UNHA LEI BÁSICA ESTATAL
A estas peticións, o sindicato UGT suma a reclamación dunha lei básica estatal que "acabe con este problema" de precariedade laboral na educación social, un sistema no cal "a sobrecarga de traballo", os "baixos salarios" e a "desprotección" son o habitual. Nun plano máis amplo, esta organización esixe "a todos os niveis" da administración pública que teñen competencias en servizos sociais que garantan "de maneira estable" o financiamento e unhas condicións laborais "dignas", independentemente de que os centros de traballo sexan de xestión pública directa ou mediante unha concesión.
