O BNG pide declarar de utilidade pública o tratamento dos piñeirais afectados polas bandas das acículas

A deputada do BNG no Parlamento de Galicia Montse Valcárcel denunciou mediante unha batería de preguntas nesta Cámara a situación que se vive nos montes lucenses de Pol, A Fonsagrada, Baleira, Castroverde ou a comarca de Meira, así como na Mariña ou A Terra Chá coa chamada enfermidade de bandas das acículas dos piñeiros.

Segundo informa a formación nacionalista, as bandas, tanto a vermella como a marrón, son enfermidades fúngicas que causan a defoliación das coníferas e o seu enfraquecemento, polo que é aconsellable aplicar tratamentos para reducir o seu impacto.

Nas masas de piñeiros galegas, engade, hai tamén danos por outras enfermidades, como a diplodia e a cyclaneusma, causadas por fungos, que a primeira ollada resultan moi parecidos aos das bandas.

Por iso, o BNG reclama ao Executivo galego declarar a utilidade pública dos tratamentos en áreas estratéxicas de piñeirais de Pinus radiata afectados as enfermidades das bandas, "de maneira que sexa posible o acceso e actuación da Administración en predios privados, por causas de interese xeral, nesta primavera de 2025".

A deputada no Parlamento Galego Montse Valcárcel visitou os montes de piñeiros das parroquias de Valonga e Lúa, en Pol (Lugo), afectados pola enfermidade das bandas. BNG | Fonte: Europa Press